«Қазақ әдеби тілі және нормалардың қалыптануы: теориясы мен тәжірибесі» атты халықаралық ғылыми-теориялық конференция. 8 қараша, 2024 жыл.
Әл-Фараби атындағы ҚазҰУ-да академик Рәбиға Сыздықтың туғанына 100 жыл толуына арналған «Қазақ әдеби тілі және нормалардың қалыптануы: теориясы мен тәжірибесі» атты халықаралық конференция өтті. Жиынға Жапония, Ресей, Түркия және басқа да елдердің ғалымдары, ҚазҰУ оқытушылары мен студенттері қатысты. Академик Рәбиға Сыздық қазақ әдеби тілінің тарихы, ортағасырлық жазба ескерткіштер, тарихи лексикология, лингвистикалық стилистика, тіл мәдениеті және басқа да салаларда еңбек сіңірген көрнекті ғалым. Ол қазақ әдеби тілінің дамуын зерттеп, бірнеше маңызды монографиялар жазған. Жиында отандық және шетелдік ғалымдар Рәбиға Сыздықтың ғылымға қосқан үлесін, қазіргі қазақ әдеби тілі мен түркітану бағыттарын талқылады.
«Адамзаттың Абайы» атты салтанатты жиын. 9 тамыз, 2024 жыл.
9 тамызда Алматы қаласының әкімдігі Абай Құнанбайұлының 179 жылдығына орай «Адамзаттың Абайы» атты салтанатты жиын мен мүшәйра ұйымдастырды. Шараға қоғам қайраткерлері, ғалымдар, ақын-жазушылар, абайтанушылар, БАҚ өкілдері мен қала тұрғындары қатысты. Іс-шара барысында Қазақ тілі оқытушыларының Халықаралық Бірлестігі атынан да сөз сөйленіп, Абай мұрасының заманауи маңызы мен оның жаһандық деңгейдегі құндылығы туралы ойлар ортаға салынды.
Қазақ тілі оқытушыларының Халықаралық Бірлестігі жазғы курс ұйымдастырды. 27 маусым - 15 шілде, 2024 жыл.
Қазақ тілі оқытушыларының Халықаралық Бірлестігі 2024 жылдың 27 маусымы мен 15 шілдесі аралығында Әжінияз атындағы Нүкіс педагогикалық институтының ғалымдарына арнап жазғы курс дәрістерін өткізді. Курс дәрістері қазақ тілін оқыту әдістемесін жетілдіру, ғылыми-педагогикалық тәжірибе алмасу және тіл мамандарының кәсіби құзыреттілігін арттыру мақсатында ұйымдастырылып, курс соңында қатысушыларға арнайы сертификаттар табысталды.
Бұл шара қазақ тілі оқытушыларының халықаралық деңгейде тәжірибе алмасуының маңызды платформасына айналып, тіл білімін дамытуға елеулі үлес қосты.
Абай шығармашылығына қатысты дәріс оқылды. 30 маусым - 6 шілде, 2024 жыл.
2024 жылдың 30 маусымы мен 6 шілдесі аралығында Семей мемлекеттік университетінің қазақ тілі кафедрасында Абай Құнанбаевтың шығармашылығына арналған дәріс оқылды. Іс-шараның негізгі мақсаты – ұлы ақынның әдеби мұрасын тереңірек таныстыру және қатысушылардың қазақ әдебиетіне деген қызығушылығын арттыру болды. Дәріс барысында Абайдың поэзиясы, философиялық ойлары мен қазақ руханиятындағы орны жан-жақты талқыланды. Қатысушыларға Абайдың кітаптары табысталып, оның шығармаларын тереңірек зерттеуге мүмкіндік жасалды. Шара ұлттың рухани құндылықтарын дәріптеуге бағытталған маңызды қадам ретінде бағаланды.
«Түрік тілінің дамуына қызмет еткен атақты түрік данышпандары» атты халықаралық ғылыми-теориялық симпозиум. 27-29 маусым, 2024 жыл.
Махмұт Қашқаридың «Диуани лұғат ит-түрк» еңбегінің 950 жылдығына орай «Түрік тілінің дамуына қызмет еткен атақты түрік данышпандары» атты халықаралық симпозиум өтті. Жиын Ыстанбұл университетінің әдебиет факультетінде ұйымдастырылып, оған университет ректоры Зульфикар Осман Бюлент, әл-Фараби атындағы ҚазҰУ ректоры Жансейіт Түймебаев, Назарбаев университеті қазақ тілі және түріктану кафедрасының меңгерушісі Юлай Шәмілоғлы сияқты танымал ғалымдар мен зерттеушілер қатысты. Симпозиумда «Диуанның» сақталуы мен танылуы, Махмұт Қашқари мұрасының ғылыми-танымдық маңызы және оның тіл біліміндегі әмбебап үлесі жан-жақты талқыланды.
«ХХ ғасыр көкжиегіндегі үш бәйтерек» республикалық байқау туралы
1-24 наурыз, 2024 жыл
Әл-Фараби атындағы Қазақ Ұлттық университетінің А.Байтұрсынұлы атындағы Қазақ тіл білімі кафедрасы және Қазақ тілі оқытушыларының халықаралық бірлестігі, Жамбыл облысы әкімдігінің мемлекеттік тілді дамыту басқармасының бірлесе ұйымдастыруымен 2024 жылдың наурыз айының 1-24 аралығында қазақ әдебиетінің үш бәйтерегі – Б.Майлин, І.Жансүгіров, С.Сейфуллиннің 130 жылдық мерейтойына орай «ХХ ғасыр көкжиегіндегі үш бәйтерек» тақырыбында республикалық байқау өтті. Байқаудың мақсаты – Алаш қайраткерлері, ақын, жазушы қазақ әдебиетінің үш бәйтерегі – Б.Майлин, І.Жансүгіров, С.Сейфуллиннің қазақ тілі мен әдебиетіне, публицистикасына қатысты мұраларын зерттеу, насихаттау және мемлекеттік тілдің мәртебесін көтеру болатын. Байқаудың үш бағыты – эссе, арнау, мақала бойынша барлығы 100-ге жуық жұмыс келіп түсті. Байқаудың Ережесіне сай 60 жұмыс қабылданып, 9 жұмыстың иесі үздіктер қатарынан көрінді. Республикалық байқауға еліміздің түкпір-түкпірінен, атап айтсақ, Алматы, Қарағанды, Ақтөбе, Семей, Тараз, Арқалық, Өскеменнен үміткерлер қатысты.
«Білім беру және тіл үйретудегі заманауи тенденциялар» атты
Халықаралық ғылыми симпозиум
17 қазан, 2023 жыл
Симпозиум мақсаты: Халықаралық деңгейдегі ғалымдардың, зерттеушілер мен ізденушілердің басын қосатын симпозиумның негізгі мақсаты – білім беру және тілді оқыту саласындағы өзекті тенденциялар мен ортақ мәселелерге шолу жасау. Технологияның білімге әсері, мәдени және географиялық факторларға байланысты көзқарас айырмашылығы, тілді оқыту әдістемесінің соңғы мен терең түсініктерді ұсынатын ғалымдардың үлестерімен бұл академиялық іс-шара жаңа ұғымдардың теңдесі жоқ перспективасын ашуды қамтамасыз етеді. Сонымен қатар, қатысушылар ойсалаларлық пікірталастарға қатысып, өз зерттеу нәтижелерін ғалымдар мен зерттеушілердің мүдделі аудиториясымен бөлісуге мүмкіндік алады.
«ЖАС ҒАЛЫМ-V»
7-8 сәуір, 2023 жыл
Назарбаев университетінде Алаштың ұлттық мінбері «Қазақ» газетінің 110 жылдығына арналған «ЖАС ҒАЛЫМ-V» атты республикалық студенттердің дәстүрлі ғылыми конференциясы өтті. Конференцияға республикадан 18 университеттің 70-ке жуық студенттері, магистранттар мен докторанттары қатысты.
«БАҒДАРЛЫ ТІЛДІК БІЛІМ: ИНТЕГРАЦИЯ, ИННОВАЦИЯ, ТЕХНОЛОГИЯ»
АТТЫ ХАЛЫҚАРАЛЫҚ СЕМИНАР
20 АҚПАН - 3 НАУРЫЗ, 2023 ЖЫЛ
2023 жылдың 20 ақпаны мен 3 наурызы аралығында Қазақ тілі оқытушыларының
халықаралық бірлестігі, Назарбаев Университеті жəне Абылай хан атындағы Қазақ
Халықаралық қатынастар жəне əлем тілдері университетінің ұйымдастыруымен
«Бағдарлы тілдік білім: Интеграция. Инновация. Технология» атты халықаралық
ғылыми-əдістемелік семинар өткізілді.
ТҰСАУКЕСЕР
6 наурыз, 2023 жыл
Назарбаев Университеті кітапханасында жаратылыстану, әлеуметтік және гуманитарлық ғылымдар мектебінің қауымдастырылған профессоры Гүлнәр Омарбекованың “Қазіргі қазақ мақал-мәтелдерін зерттеу цифрлық, танымдық, әдеби және экологиялық бағыттар” атты кітабының тұсаукесері өтті. Мақал-мәтелге арналған зерттеулер жинағы Питер Ланг (Нью-Йорк) баспасында 2022 жылы жарық көрді.
.jpg)
2022 жыл, 15 сәуір
«ЖАС ҒАЛЫМ-ІV»
Ұлт ұстазы Ахмет Байтұрсынұлының 150 жылдық мерейтойына арналған «ЖАС ҒАЛЫМ-ІV» атты республикалық студенттердің дәстүрлі ғылыми конференциясы өткізілді. Конференция онлайн форматта өтті. Конференцияға республикадан 16 университеттің студенттері мен магистранттары қатысты.
2021 жыл, 17-18 ақпан
"Ғалым және ғылыми басылым: ізденіс платформасы"
Қазақ тілі оқытушыларының халықаралық бірлестігінің ұйымдастырумен Назарбаев Университетінде 2021 жылы 17-18 ақпанда «ҒАЛЫМ ЖӘНЕ ҒЫЛЫМИ БАСЫЛЫМ: ІЗДЕНІС ПЛАТФОРМАСЫ» атты халықаралық ғылыми семинар өтті. Семинардын мақсаты Қазақстанның ғылыми кеңістігіндегі ғылыми-зерттеу жұмыстарының сапасын дамытуға ат салысу; жас ғалымдардың ғылыми-зерттеу дағдыларын қалыптастыру және дамыту; отандық және халықаралық ғылыми басылымдардың талаптарымен таныстыру; қазіргі жаңаша ғылыми парадигмалар аясын анықтау болды.
"Қазақ мақал-мәтелдеріне арналған шетелдік басылымда мақала жариялау" атты вебинар
2021 жылдың 20 сәуірінде Назарбаев Университеті және Қазақ тілі оқытушыларының халықаралық бірлестігі қазақ мақал-мәтелдерін зерттеуге арналған шетелдік басылымда мақала жариялау мәселесі бойынша халықаралық онлайн вебинар өткізді. Вебинар барысында Erik Aasland "Peter Lange Publishing" баспасының халықаралық фольклористика сериясы және баспаның талаптары туралы мәлімет берсе, (АҚШ) Назарбаев Университетінің қауымдастырылған профессоры Г.Ә. Омарбекова халықаралық басылымға ұсынылатын мақаланың құрылымы жайлы баяндама жасады. Вебинар соңында аталған тақырыптар бойынша сұрақ-жауап алмасуда тыңдаушылардың сұрақтарына жауап берілді. Вебинар материалдарымен сайттағы әдістемелік қор бөлімінде танысуға болады.
2021 жыл, 6-10 желтоқсан
«Бағдарлы тілдік білім: Интеграция. Инновация. Технология»
атты семинар
2021 жылдың 6-10 желтоқсан аралығында Қазақ тілі оқытушыларының халықаралы
бірлестігі, Назарбаев Университеті және Сулейман Демирель университетінің ұйымдастыруымен «Бағдарлы тілдік білім: Интеграция. Инновация. Технология» атты халықаралық ғылыми-әдістемелік семинар өткізілді. Семинардың негізгі мақсаты – қазақ тілін ЖОО-да практикалық, кәсіби мақсатта оқытудың өзекті мәселелерін талдау, тәжірибемен бөлісу, қазақ тілін шетелдік азаматтарға оқытудың ерекшеліктері мен тиімді жолдарын қарастыру.
2020 жыл, 9 қазан
ҚАЗАҚ ТІЛІ ОҚЫТУШЫЛАРЫ ХАЛЫҚАРАЛЫҚ БІРЛЕСТІГІ
ЖАЛПЫ ЖИНАЛЫСЫ
Қазақ тілі оқытушыларының халықаралық бірлестігі 2 жылдың ішінде қазақ тілін оқыту әдістемесін дамыту, халықаралық жобалар аясында қазақ тілі мәселелерін жүйелеу және түркі қауымдастықтарымен, халықаралық тіл оқыту орталықтарымен ынтымақтасу бағыттарында іс-шаралар атқарып келеді. Жиналыста Бірлестіктің 2 жылдық есебін тыңдалды, 2018 – 2022 жылдарға арналған стратегиялық жоспарға толықтырулар мен өзгерістер енгізілді және қазақ тілін шетелде оқыту мәселелерін талқыланды.
2019 жыл, 12-19 сәуір
Тұңғыш академик Қаныш Имантайұлы Сәтпаевтың туғанына 120 жыл толуына орай «Жас ғалым» атты студенттердің ғылыми көрмесі болып өтті.
«Жас ғалым» атты студенттердің ғылыми көрмесіне Нұр-Сұлтан қаласының 5 университеттерінен 60-тан астам студенттер мен профессорлар қатысты. Көрмеге қатысқан ЖОО қатарында: Гумилев атындағы Еуразия Ұлттық Университеті; Сейфуллин атындағы Қазақ агро-техникалық университеті; Нәрікбаев атындағы Қазақ Заң университеті; Еуразия гуманитарлық институты; «Тұран-Астана» университеті. Ғылыми көрмеде сарапшыларының іріктеуінен өткен үздік 40 ғылыми постерлер мен ғылыми мақалалар қойылды. Студент постерлері зерттеу салалары бойынша 4 ғылыми бағыттар бойынша жүйеленді: Қазақ тіл білімі; Қазақ әдебиеттану ғылымы; Әлеуметтік-гуманитарлық ғылымдар; Жаратылыстану-техникалық ғылымдар. Ғылыми постерлер тақырыбы отандық және халықааралық деңгейдегі өзекті мәселелерге арналды.
2019 жылы наурыз
Іскерлік сапар
Назарбаев Университеті, Қазақ тілі және Түркі тілдері департаментінің ассоциативті профессоры Гүлнар Әділдақызы Омарбекова Аризона Университетінің (АҚШ), Таяу Шығыс зерттеулер орталығының (CMES) арнайы шақыруымен 2019 жылы наурыз айында іскерлік сапарда болып қайтты. Сапар барысында америкалық білім беру жүйесінің үш деңгейінде, яғни орта мектеп, колледж және Аризона университеті магистранттары және оқытушыларымен кездесу өтті.
2018 жыл, 16 ақпан
Қазақ тілі оқытушыларының халықаралық бірлестігінің кезектен тыс жалпы жиналысы болып өтті.
Жиналысқа Бірлестіктің Жоғары кеңес мүшелері, ұйымдастыру алқасы, бірлестік мүшелері мен ЖОО профессор-оқытушы құрамы қатысты. Жиналыс барысында Бірлестіктің заңды түрде бекітілген Жарғысы, бірлестіктің 2018-2022 жылдарға арналған Стратегиялық жоспары, 2018 жылғы жоспары, мүшелік жарна, Бірлестіктің веб сайты таныстырылды. Сонымен қатар,отандық және халықаралық ұйымдармен ынтымақтастық орнату мәселелері талқыланды.
2017 жыл, 26-28 қазан
Назарбаев Университеті, Гуманитарлық және әлеуметтік ғылымдар мектебінің ұйымдастыруымен «Қазақ тілі мен түркітанудың өзекті мәселелері: ХХІ ғасырдағы рухани жаңғыру» атты халықаралық ғылыми-практикалық конференция болып өтті.
Конференция аясында "Қазақ тілі оқытушыларының халықаралық бірлестігінің" жалпы жиналысы өткізілді. Жиналыста Бірлестіктің Жарғысын әзірлеу және Әділет министрлігінде тіркеу, бірлестіктің құрылымын бекіту, Бірлестік Приезидентін, Құрылтайшылар кеңесін сайлау, т.б мәселер талқыланды.
2017 жыл, 10 ақпан
Қазақ тілі оқытушыларының халықаралық қауымдастығы Ұйымдастыру комитетінің бірінші отырысы болып өтті.
Бұл жиында ұйымдастыру комитеті мүшелері бас қосып, қауымдастықтың мақсаттары мен міндеттерін айқындау, қауымдастық жарғысын заңдастыру, алдағы өткізілетін іс-шаралар жоспары құру секілді маңызды мәселерді талқылады.
2016 жыл, 24-25 қараша
Қазақстан Республикасы Тәуелсіздігінің 25 жылдық мерейтойы аясында Назарбаев Университетінің ұйымдастыруымен «МӘҢГІЛІК ЕЛДІҢ МӘҢГІЛІК ТІЛІ» атты халықаралық симпозиум өтті.
Симпозиум мақсаты: Қазақстан Республикасының мемлекеттік тілі – қазақ тілінің жаһандану үрдісіндегі даму бағытын нақтылау, жоғары оқу орындарында қазақ тілін оқыту мазмұнын академиялық және кәсіби бағытқа негіздеу, тілді оқыту үрдісіне озық инновациялық технологияларды қолдану мәселелерін талқылау.
Симпозиум жұмысына еліміздің және шетелдік танымал тілші, әдебиетші, тюрколог ғалымдары, Қазақстан Республикасы тәуелсіздігіне еңбегі сіңген қоғам қайраткерлері, жоғары оқу орындарының оқытушылары, білім-ғылым мекемелерінің мамандары, жас ғалымдар қатысты.